Apesar da péssima reputaçom da culinária inglesa, o Michelin Guide Great Britain & Ireland 2008 recomenda nada menos que quarenta e cinco restaurantes em Londres, distinguido-os com as suas prestigiosas estrelas. Mas no Capítulo Cerdo nom os vou aborrecer falando-lhes do Gordon Ramsay, o único restaurante londinense com três estrelas Michelin e considerado um dos melhores do mundo. Aqui, ao nosso:

Jacket potato

No Ponti’s do mercado de Covent Garden comim esta jacket potato with chicken curry, nome que me permito agalegar como cachelo com caril de polo, ainda sendo consciente de que a traduçom é traiçoeira, pois o cachelo é umha pataca cozida com a tona e a jacket potato é umha pataca assada com a tona. A receita tradicional inglesa consiste em assar a pataca (duas horas no forno ou quarenta e cinco minutos no micro-ondas), cortá-la pola metade e untar-lhe manteiga ou um molho denominado coleslow, que é umha mistura de couve ou repolo, cenoura, cebola e maionesa. Também podem ser servidas cobertas de queijo e cebola fritida.

Como o Ponti’s é um estabelecemento teoricamente italiano, a guarniçom tradicional do cachelo substitui-se por bolognese e outros molhos para massa, mas eu optei por um chicken curry por me semelhar mais consistente. O resultado foi o previsível: o caril saboriza o frango até neutralizar por completo o gosto da carne e acai bem ao tubérculo, que é umha pataca bem farinhenta, inglesa ou irlandesa. Com as boas patacas que temos na Galiza, é mágoa que os nossos restaurantes de comida rápida nom copiem esta fórmula, de grande sucesso nessa meca da gastronomia que é o Reino Unido.

Mercado de Covent Garden

Umha das maiores satisfacçons de comer este cachelo foi o cenário: o mercado de Covent Garden (foto: dbaron, CC), inaugurado em 1830 para acolher o principal mercado de fruta e verdura da cidade. O edifício foi salvado da voracidade dos especuladores imobiliários graças à pressom dos vizinhos e converteu-se hoje num polo de atracçom para as artes, o comércio e o teatro.

2 Comments to "Cachelo com caril de polo"

  • ifrit said:

    Unha mágoa que o Mercado do Bolhão non vaia correr a mesma sorte…

    E no culinario dicir que non fai falla arriscarse tanto polo bló, que inda non temos patrocinadores e nosos soldos son baixos e sen cobertura sanitaria XDDD

  • maceirax said:

    No restaurante Juventud de Narón (escoitara que funciona/ba algo asi coma un centro de rehabilitación de drogodependentes) preparaban por uns 5 euros unha xoia chamada SUPERBOCATA (perdoade as Maiús, o produto meréceo). Tratábase dunha barra de pan rechea de ensalada, xamón, queixo, beicon, lombo, salchichas, hamburguesa e non sei se aínda levaba máis. Os compañeiros do piso facíamos apostas a ver quen tiña bandullo -e peito- para rematalo dunha sentada; en consecuencia unha desas bombas tentaba abrirse paso entre peito e lombo como unha vez á semana.
    Mais de repente un día deixaron de atender o teléfono do servizo a domicilio, non sei se pechou ou que pasou pero o SUPERBOCATA desapareceu da miña vida. Sería a ostia que tivera o seu sitio en Capítulo Cerdo, aviso que xa pola foto do trabuco vale a pena 🙂